Tekolo ya ditoro – Go lora ka meetse

GO LORA KA MEETSE

Ditoro ke melaetša ya go tšwa go Mangeloi goba Badimo ba rena, ke ka moo re hlokago go ithuta ka ga ditoro le gore di emela eng. Go lora ka meetse go ka emela dilo tša go fapana, gomme tekolo ya toro e laolwa ke gore o ikwa bjang, meetse ao oa bonago a hlwekile goba a tšhilafetse naa gape oa bona kae. Oa hlapa? Oa tuntela? Oa bonela kgole? Goba a ka gare ga ntlo naa?

Lehono re tlo tsinkella gare ga taba ya go lora ka meetse. Gape o gopole gore re le batho re tšwa malapeng a go fapana gomme le Mangoloi a rena a bolela le rena ka ditsela tša go fapana,ke ka fao ditlhaloso di tla fapana le tšeo rena renago natšo. A re lekoleng faa:

GO LORA O TUNTELA

Go lora o tuntela ka gare ga swimming pool, gomme meetse ao o tuntelago gare go ona a hlwekile go ka go botša dilo tše mmalwa. Toro ye e ka go botša gore o hloka go ihlwekiša, go hlapa gore o tloše memoya yeo e sa go lokelago, se o ka se dira ka go nyaka thušo go mangaka goba barapedi le baporofeta. Gape toro ye e ka bowa gape ya go botša gore o letele tše dibotse mo matšatšing a gago le gore o ka kwa ditaba tša go thabiša.

Go lora o le ka gare ga noka goba Swimming pool ya go hlweka le go kgahliša go ka go botša gore o na le dimpho tša go alafa, go bona/porofeta le borapedi. Efela gopola gore molaetša wa go go tsebiša ka dimpho tša semoya go tlile go tla gape ka ditoro tša go fapana le ka ditoro tšeo di go botšago ka tšeo di sa tlago go direga mo bophelo bja gago.

GO LORA KA MEETSE A DITŠHILA

Go lora o bona meetse ao a tšhilafetšego goba a ntshofetšego ke toro ya go se kgahliše gomme e go bontšha seemo sa bophelo bja gago. Go lora meetse a ditšhila go ka go botša gore o hlokomele bolwetsi boo o bo tseelago fase gobane bo ka ba šhoro morago ga nakonyana. Gape toro ye e go botša gore o aparetše ke madimabe le go hlakahlakana ga bona bophelo bja gago. Lebedišiša bophelo bja gago, o be o nyakišiše go bao ba kgonago go bona ka marapo le semoya gore o kgone go tšwa gare ga lefifi leo o lego gare ga lona.

GO LORA MEETSE A TSENA KA NTLONG

Go tsenelwa ke meetse ka ntlong go laetša mathata ka gare ga lapa le leloko, ke ka moo o ka kwago motho a akaretša mathata a gagwe ka gore o tsenetšwe ke meetse ka ntlong. Meetse ka ntlong ga a nyakege gobane a tla ka tshenyo, a ka senya fenishara, a senya dilo tša go šoma ka mohlagase gomme le dijo. Ke ka moo re karego go lora meetse a tsena ka ntlong ke toro ya go fiša dipelo le matswalo.

Go lora meetse a tsena kantlong go ka laetša mathata le matshwenyego gare ga bophelo bja gago goba leloko la gago. Gape toro ye e ka bolela gape ka gore o tlo hlagelwa ke mathata gare ga dikgwebo le mešhomo ya gago.

Ge o lora meetse a ditshila a tsena ka ntlong go ka laetša kgatelelo ya malwetši ka gae, gape toro ye e ka go botša gore go na le memoya yeo e sa lokago ka gare go legae la gago gomme yona memoya yeo e ka go tlišetša madimabe. Bjale re ka go hlohloletša gore o eme ka maoto o nyakišiše ka bona bophelo bja gago.

Re fehlile bofelong bja dihlahlobo tša rena tša lehono. Re tshepha gore di le tšwetše mohola ebile dia kgotsofatša. Gopola go romela le bao o ba ratago link gore le bona ba kgone go ba le kwišišo ka ditoro tša bona.

Thobela!